Credo

Immer trotz au schlächte Zite,
und trotz de stränge Sitte,
het mer dene spassig Lüte,
s'Lache ned chönne verbüte.

Lache düend vor allem die lustige Lüt,
und dere gits zu jeder Zit.

Veli lached, wels so send,
oder wägemene komische Grend,
und weder anderi wägemene Scherz,
oder eifach wägemene guete Härz.

S'Lache aber us Schadefreud,
das bringt de Einte no meh Leid,
drum schüched mer eus, 
üs so z'amüsiere,
um uf besseri Art z'brilliere.

S'beschti Lache vo Frau und Ma,
esch das womer über sech selber cha,
denn am schönschte esch, egal was s'wend,
wenn alli öpis z'lache hend.

Euses Lache söll wie d'Grippe si,
keine chond do dra verbi,
met Träne i de Auge hebsch Der de Buuch,
es fählt d'Kraft und au de Schnuuf. 

Vo de Chappe bis zum Schueh,
wend mer stets Guets tue,
met Humor durs Läbe schrite,
und s'Lache bringe dene Lüte.

Und söt dis Läbe z'Änd mol go,
so bliebt dis Lache be üs bestoh,
i eusne Härze ganz wit drinne,
düend mer eus alli a Dech zrugg b'sinne.

Drum liebi spassig Zuger Lüt,
es git im Läbe eifach nüt,
wo so lang i guete Erinnerig bliibt,
wie s'Lache vo de lustige Lüt.